କୋଭିଡ କଟକଣାକୁ ଦୃଷ୍ଟିରେ ରଖି ଶ୍ରୀ ଶିରୁଳି ମହାବୀର ମନ୍ଦିରରେ ମହାବିଷୁବ ପଣା ସଂକ୍ରାନ୍ତି ତଥା ହନୁମାନ ଜୟନ୍ତୀ ପାଳନ ଅବସରରେ ମନ୍ଦିର ପରିସରରେ ଜନସାଧାରଣଙ୍କ ପ୍ରବେଶ ଉପରେ କଟକଣା ଜାରି କରାଯିବା ସହ ୧୪୪ ଧାରା ଜାରି କରାଯାଇଛି । ଏହି କଟକଣା ଆସନ୍ତା ୧୪ ତାରିଖ ସକାଳ ୪ ଘଟିକା ଠାରୁ ୧୫ ତାରିଖ ପର୍ଯ୍ୟନ୍ତ ଜାରି ରହିବ । ସେହିଭଳି ରାମ ନବମୀ ପାଳନ ଅବସରରେ ଆସନ୍ତା ୨୧ ତାରିଖ ସକାଳ ୪ ଘଟିକା ଠାରୁ ରାତି ୯ ଘଟିକା ପର୍ଯ୍ୟନ୍ତ ଏହି କଟକଣା ଜାରି କରାଯାଇଛି ।
ମାତ୍ର ଠାକୁରଙ୍କ ନୀତିକାନ୍ତି ବିଧି ମୁତାବକ ଚାଲୁ ରହିବ । ପ୍ରତ୍ୟେକ ଠାକୁରଙ୍କୁ ନେବା ଆଣିବା ତଥା ମେଳଣ ନିମନ୍ତେ ମାତ୍ର ୧୦ ଜଣ ବ୍ୟକ୍ତି ନିୟୋଜିତ ରହିବେ । ସ୍ଥାନୀୟ ଚନ୍ଦନପୁର ଥାନାଧିକାରୀଙ୍କ ସହ ପରାମର୍ଶ କରି ମନ୍ଦିର କମିଟି ପକ୍ଷରୁ ସଂପୃକ୍ତ ସେବାୟତ ଓ ସହଯୋଗୀ ମାନଙ୍କୁ ପ୍ରବେଶାନୁମତି ପତ୍ର ପ୍ରଦାନ କରାଯିବ । ସେହିଭଳି କୃଷ୍ଣପ୍ରସାଦ ଥାନା ଅନ୍ତର୍ଗତ ଦେଉଳପଡାସ୍ଥିତ କମଳେଶ୍ବର ମନ୍ଦିର ପରିସରରେ ମହାବିଷୁବ ପଣା ସଂକ୍ରାନ୍ତି ଓ ପଣା ଯାତ୍ରା ପାଳନ ଅବସରରେ ଜନ ସମାଗମ ଉପରେ ମଧ୍ୟ ୧୪୪ ଧାରା ଯାରି କରାଯାଇଛି । ଆସନ୍ତା ୧୩ ତାରିଖ ସକାଳ ୬ ଘଟିକା ଠାରୁ ୧୬ ତାରିଖ ସନ୍ଧ୍ୟା ୬ ଘଟିକା ପର୍ଯ୍ୟନ୍ତ କଟକଣା ଯାରି ରହିବ । ମାତ୍ର ଠାକୁରଙ୍କ ବିଧିମୁତାବକ ପୂଜାର୍ଚ୍ଚନା ଚାଲିବ । ପ୍ରତ୍ୟେକ ଠାକୁରଙ୍କୁ ନେବା ଆଣିବା ତଥା ମେଳଣ ନିମନ୍ତେ ମାତ୍ର ୧୦ ଜଣ ବ୍ୟକ୍ତି ନିୟୋଜିତ ରହିବେ । ସ୍ଥାନୀୟ କୃଷ୍ଣପ୍ରସାଦ ତହସିଲଦାରଙ୍କ ପକ୍ଷରୁ ସଂପୃକ୍ତ ସେବାୟତ ଓ ସହଯୋଗୀ ମାନଙ୍କୁ ପ୍ରବେଶାନୁମତି ପତ୍ର ପ୍ରଦାନ କରାଯିବ । କରୋନା ଆକ୍ରାନ୍ତଙ୍କ ସଂଖ୍ୟା ଦୈନିକ ବୃଦ୍ଧି ପାଉଥିବା କାରଣରୁ ଉପଜିଲ୍ଲାପାଳ ଶ୍ରୀ ଭବତାରଣ ସାହୁ ଏହି କଟକଣା ଯାରି କରିଛନ୍ତି । ମାତ୍ର ଉଭୟ ସ୍ଥାନରେ ଉକ୍ତଦିନ ଗୁଡିକରେ ସାଧାରଣ ଜରୁରୀକାଳୀନ ସେବା ଚାଲୁ ରହିବ । କର୍ତ୍ତବ୍ୟପାଳନ ନିମନ୍ତେ ନିୟୋଜିତ ଅଧିକାରୀ ଓ କର୍ମଚାରୀ, ଖବର ପ୍ରସାରଣ ନିମନ୍ତେ ସ୍ଥାନୀୟ ସାମ୍ବାଦିକ ମାନଙ୍କୁ ପ୍ରବେଶ ପାଇଁ ଅନୁମତି ଦିଆଯିବ ।
