ସୁନ୍ଦରଗଡ ଜିଲ୍ଲା କୁତ୍ରା ବ୍ଲକ ଅନ୍ତର୍ଗତ ଖଟଙ୍ଗ ପଞ୍ଚାୟତ ସଂଲଗ୍ନ ଜଙ୍ଗାରପଡାର ବାସିନ୍ଦା ବିର୍ଜୁ କୁଲୁ ଦୀର୍ଘ ୨୫ ବର୍ଷ ଧରି ନିଖୋଜ ଥିବା ବେଳେ ସେଥିରୁ ୨୦ ବର୍ଷ ହେବ ପାକିସ୍ଥାନର ଲାହୋର ଜେଲରେ ବନ୍ଦୀ ଜୀବନ ବିତାଇଛନ୍ତି । ଆଉ ଦିନ କେତେଟା ପରେ ସମ୍ପୂର୍ଣ୍ଣ କାହାଣୀ ଲୋକ ଲୋଚନକୁ ଆସିବ ବୋଲି ଚର୍ଚ୍ଚା ଯୋର ଧରିଛି । କେତେଟା ଦିନ ପରେ ନିଜ ଭିଟାମାଟିରେ ପାଦ ଦେବେ ବିରଜୁ କୁଲୁ । ସମ୍ପର୍କୀୟ ଓ ଗ୍ରାମବାସୀ କହନ୍ତି ସାମାନ୍ୟ ମାନସିକ ଅନଗ୍ରସର ଥିବା ବିରଜୁ ୨୫ ବର୍ଷ ତଳୁ ଘରୁ ବାହାରି କେଉଁ ଆଡେ ନିଖୋଜ ହୋଇଯାଇଥିଲେ । ତଦନ୍ତ ପରେ ଜଣା ପଡିଥିଲା ସେ ୨୦ ବର୍ଷ ହେଲା ଲାହୋର ଜେଲରେ ବନ୍ଦୀ ଜୀବନ କାଟୁଥିଲେ । ତେବେ କେନ୍ଦ୍ର ସରକାରଙ୍କ ତତପରତା ଯୋଗୁଁ ସେ ଲାହୋର ଜେଲରୁ ମୁକୁଳି ପଞ୍ଜାବ ସ୍ଥିତ ଅମୃତସର ସହରର ନାରାୟଣଗଞ୍ଜ କୋଭିଡ ଚିକିତ୍ସାଳୟରେ ଚିକିତ୍ସାଧିନ ଅଛନ୍ତି । ଅଳ୍ପଦିନ ଭିତରେ ସେ ନିଜର ଭିଟାମାଟିକୁ ଫେରିବାର ବିଶେଷ ସମ୍ଭାବନା ରହିଛି । ବିରଜୁ ଘରକୁ ଫେରିବା ପରେ ଘରୁ ବାହାରିବା ଠାରୁ ୨୫ ବର୍ଷର ସମ୍ପୂର୍ଣ୍ଣ ପୂର୍ବ କାହାଣୀ ଲୋକ ଲୋଚନକୁ ଆସିବ ବୋଲି ସାଧାରଣରେ ଚର୍ଚ୍ଚା ଚାଲିବା ସହିତ ତାଙ୍କର ଫେରିବା ବାଟକୁ ଗ୍ରାମବାସୀ ଅପଲକ ନୟନରେ ଅନାଇ ବସିଛନ୍ତି ।
ସୁନ୍ଦରଗଡ଼ ରୁ ବ୍ୟୁରୋ ଚିଫ ସଂଜୀବ କୁମାର ପାଢୀଙ୍କର ରିପୋର୍ଟ
